عمري ما كنت أتخيل إن جوزي هيوحشني بالشكل ده بعد ما نطلق

عمري ما كنت أتخيل إن جوزي هيوحشني بالشكل ده بعد ما نطلق الجزء الأول

عمري ما كنت أتخيل إن جوزي هيوحشني بالشكل ده بعد ما نطلق في مرة كنت قاعدة معاه نتفرج سوا على التليفزيون وهو قام يشرب من المطبخ، سمعت صوت رسالة جاية له على الواتس، الفضول خلاني امسك تليفونه وافتح الرسالة بسرعة بصيت عليها كانت من رقم مش متسجل.

فتحتها كانت صورة بنت بعتها له وهي مبتسمة وكاتبة له عليها حبيبي أنا هنام تصبح على خير، كنت عايزة اجيب المحادثة كلها اقرأها بس كان ممكن يجي وأنا ماسكة تليفونه ويعرف إني شفتها، رجعت كل حاجة زي ما كانت وفضلت قاعدة بحاول ابقى هادية لحد ما دخل نام دخلت اتسحبت وجبت تليفونه وفتحته وفضلت اقرأ في كلامهم سوا وأنا مقهورة وبعيط.

عمري ما تخيلت إن جوزي يعمل كده، دخلت التليفون مكانه وغيرت هدومي ومشيت روحت بيت بابا، وصلت البيت وأنا مُنهارة أول ما أهلي شافوني اتخضوا ومكنتش قادرة اتكلم، بابا كان هيتصل بجوزي أنا صرخت وقولت له لأ متكلمهوش مش عايزة أشوفه، حاول يهديني وخلاني دخلت أنام، تاني يوم صحيت لاقيت بابا قاعد جنبي بيصحيني وبيبتسم لي

صباح الخير يا حبيبة بابا نمتي كويس؟

فضلت صاحية لحد الصبح

طب يلا عشان نفطر

مش هتسألني إيه اللي حصل يا بابا؟