الخطيئة

– الشيك دا، دا تبرع، عمل خيري
= الله، الله يا منال هانم، ربنا يكتر من أمثالك، تبرع ب 200000، ولشخص واحد، على كدا بقى بتعملي ايه مع بقية الفقرا اللي ماليين البلد، دا لو كل الأغنيا اللي في البلد بالسخاء دا مكانش بقى فيها فقرا

– انا مش هتكلم غير قدام المحامي بتاعي لو سمحت
= مدام منال انتي شخصية عامة، من عيلة كبيرة وجوزك كمان رجل أعمال كبير، يعني مش وش بهدلة، لو فيه نصيحة اقدر اقدمهالك هتبقى انك تقولي الحقيقة وتعترفي بكل حاجة، الشيك اللي عليه امضتك دا هيخلي موقفك في

القضية في قمة السوء،الشيك دا اصلا هو اللي حطك في خانة الاتهام، مش منطقي سيدة مجتمع زيك تربطها أي صلة بسواق تاكسي، ومش منطقي اكتر انك تكتبيله شيك بمبلغ زي دا قبل ما يموت بيوم هو وكل اسرته، وقائع الحادثة بتقول انها كانت مدبرة، وتحريات المباحث بتقول ان القتيل كان بتربطه بيكي علاقة قديمة

– كان زميلي في الكلية
= مش بس كدا، عندنا معلومات بتقول ان كان فيه بينكم قصة حب قديمة، لقينا عنده جوابات بخط ايدك كانت مبعوتاله ايام الجامعة، لحسن الحظ ان الحريقة مطالتهاش، كان شايلهم في الساندره، مفيش تفسير منطقي يربط كل الخيوط دي ببعضها غير انه حاول يبتزك بالجوابات دي مثلا، استجبتي لتهديده وكتبتيله شيك بالمبلغ دا وبعد كدا قررتي تتخلصي منه للأبد، بالاستعلام عن حسابك البنكي اتضح لينا ان المبلغ دا هو كل رصيدك في البنك، ايه اللي ممكن يخليكي تدفعي كل المبلغ دا لفؤاد الا اذا كان بيهددك بحاجة كبيرة، صدقيني يا مدام منال، مسألة وقت بس علشان كل حاجة تتكشف، الاحسن ليكي تعترفي بكل حاجة جايز اقدر اساعدك، الجرايد كتبت عن الحادثة، وبعد ثبوت تورطك فيها هتبقى قضية رأي عام

– ارجوك انا مش هتكلم غير في حضور المحامي بتاعي
= مين المحامي بتاعك
– عاصم البنداري، اخويا الكبير
= تمام، تقدري تتصلي بيه

وكلمت عاصم، نص ساعة وجالي النيابة، استئذن من وكيل النيابةوقعد معايه على انفراد

– انتي يا منال، انا مش مصدق نفسي، انتي ايه اللي يورطك مع واحد زي دا
= مش وقته يا عاصم، فيه جواب تهديد كان باعتهولي قبل ما يموت، الجواب دا انا نسيته في البيت، على المكتب، لو راحوا البيت وفتشوا ولقيوا الجواب دا انا هلبس القضية رسمي

-ششششش، وطي صوتك، كان بيهددك بإيه يا منال؟
= قولتلك مش وقته يا عاصم، ابعت حد عندي البيت ياخد الجواب ارجوك، مفيش وقت
– حاضر، بس انتي لازم تحكيلي كل حاجة يا منال، مفيش حد يقدر يخرجك من المصيبة دي غيري، ومش من مصلحتك تخبي عليا اي حاجة خالص، لو فيه اي تفصيلة انتي شايفاها مش مهمة، بالنسبالي انا تفرق كتير اوي، اتكلمي واحكيلي كل حاجه
= هحكيلك يا عاصم، بس اوعدني اللي هقوله يفضل سر بيني وبينك

– مش محتاجة تطلبي مني طلب زي دا يا منال، انا اخوكي الكبير، واظن انتي عارفة طول عمرك ان مفيش حد بيخاف عليكي قدي

وحكيت لعاصم، بس محكيتش كل حاجة، خوفت بقى اتكسفت، معرفش، المهم انه معرفش ان اللي في بطني مش ابن مصطفى، كل اللي حكيته اني رجعت اقابل فؤاد تاني من ورا جوزي، ومع ان اللي حكيته مش نص الحقيقة الا ان عاصم اتصدم فيا

– انا مش مصدق انك عملتي كدا، انتي مين، انتي منال اختي، اختي ايه دا انتي بنتي، دا انا مربيكي على ايدي، تعملي كل دا، انتي عارفة ابوكي لو شم خبر باللي انتي عملتيه دا هيحصله ايه، هيموت فيها يا منال، مش كفاية صدمته في نهال اختك اللي قعدته على كرسي متحرك من 15 سنة، المرادي مش هيستحمل

= ارجوك يا عاصم، خرجني من المصيبة دي الاول وبعدين قطمني زي ما انت عايز، انشاله حتى تجلدني
– ماشي يا منال، على العموم متقلقيش، انا وصلت لثغرة وانتي بتحكي كدا هنقدر نخرجك بيها من القضية خالص
= ايه هي يا عاصم الحقني
– الاول، هتمضيلي على العقد دا
= عقد ايه دا

– دا عقد بيع العزبة بتاعة الفيوم اللي بابا كان كتبها باسمك زمان لما قرر يوزع ثروته علينا بالحيا، وانتي عارفة وانا عارف ان العزبة دي مش حقي ولا حقك يا منال، دي بتاعة نهلة اختك، وبابا حرمها من كل حاجة، وانا مش هاخد حاجة لنفسي، انا هاخد منك العزبة وارجعها لنهلة..
= موافقة بس خرجني من الورطة دي، انت قولتلي فيه ثغرة، ايه هي

– اقولك، الشيك اللي انتي كتبتيه لفؤاد، انتي غلطتي وكتبتي فيه المبلغ بالارقام بس، مش بالحروف، احنا هنقول ان فؤاد كان جايلك بصفته صديق قديم يطلب منك اعانة وانتي كتبتيله شيك ب 200 جنيه وطلبتي منه ميجيش بيتك تاني وهنجيب كام شاهد على الكلام دا، اللي حصل بعد كدا ان فؤاد طمع ولعب في الشيك وغير المبلغ المكتوب.. دي هتقلب القضية كلها…

عاصم يقابل نهلة بعد خروجه من النيابة على الطريق الصحراوي

-انا نفذت اتفاقي ورجعتلك عزبتك اهو، نفذي بقى اتفاقك انتي كمان

الحلقة السابعه من هنا

الثامنه

الخطيئه

– سر ايه يا عاصم اللي تمنه حياتي، اوعى تكون عايز تعترفلي ان فيه علاقة بينك وبين ثريا، مراة اخوك

= انتي عرفتي الكلام دا منين؟

– هو انت مصدق ان دا سر فعلا، انت لو عارف فعلا انه سر مكنتش قلته دلوقتي قدامي

– انا مصدوم

= لا، انت مش مصدوم يا عاصم ولا حاجة، انت عارف كويس اني شامة ريحة اللي بينك وبين ثريا، ومش من دلوقتي، من اول ما رجعت من أمريكا، نظراتكو مكانتش نظرات واحد لمراة اخوه، طريقة كلامكم وهزاركم

– كنا مفضوحين؟

= بالعكس، كنتو متحفظين اكتر من اللازم، كلامكم رسمي، نظراتكم حريصة، دا في حد ذاته فضيحة يا عاصم، يا عاصم يا حبيبي لازم تكون فاهم ان الشقة اللي عليها 14 قفل هي اكتر مكان ملفت للحرامية، لما بتبالغ في محاولة اخفاء شيء انت في الحقيقة بتظهره من غير ما تقصد دا، انت راجل محامي كبير والمفروض الكلام دا في صميم تخصصك، عيب انا اللي افهمهولك، حاول تتعامل مع ثريا بشكل طبيعي على الأقل قدام الناس، حاول تنسى ان فيه حاجة خاصة بينك وبينها..

– انتي بقيتي كدا امتى؟

= انت كنت بتعملي اختبار، عايز تتأكد انا عارفة حاجة وللا لأ، بس اطمن، اظن منتصر لسه ميعرفش حاجه، دايما الزوج اخر من يعلم

– طب حيث انك عارفة كل حاجه يا نهلة احب اعرف المعلومة دي هتفيدنا في حكاية البرلمان؟

= لا يا متر، انا مبلعبش على ملف الفضايح دا، دا شغل رخيص تعملوه انتو يا بتوع السياسة، وبعدين دي فضيحة ليك انت مش لمنتصر، انسى الحكاية دي خالص يا عاصم، وركز معايه في اللي هقوله

– قولي يا بروفيسورة، قولي واتحفيني

= لازم تغير جلدك يا عاصم

– ازاي؟

= الدين يا عاصم، الدين أفيون الشعوب زي ما قال كارل ماركس، انا عمري ما كنت ماركسية بس مؤمنة بالمقولة دي اوي، اسهل طريقة تسيطر بيها على عقول الناس انك تقنعهم بإنك مندوب ربنا في الأرض، ساعتها كل حرف بتقوله لازم يتصدق، الناس هتثق فيك وهي مغمضة وانت لازم تغير صورتك القديمة، خلاص الشعارات الاشتراكية بتاعة الستينات دي فات زمنها، دلوقتي السادات بيخرج الاسلاميين من جحورهم علشان يضرب بيهم الشيوعيين والناصريين اللي ملوا البلد، لازم تستفيد من الموجة دي قبل ما تنتهي

= يعني عايزاني اعمل ايه، اربي دقني؟

– لا، عايزة اسمك يلمع مع جماعة اسلامية نشطة زي الاخوان المسلمين مثلا، محدش غيرهم دلوقتى على الساحة قادر يحشد جمهور على الارض، اتوقع ان النظام هيصالح الاخوان الفترة الجاية بكام كرسي في المجلس في مقابل انهم يلعبوا دور القط اللي بيلم الفيران من الشقة، دي لعبة قديمة الحكومة بتلعبها معاهم من ايام الملك، دي فرصتك علشان تكون معاهم، هما دلوقتي محتاجينك، محتاجين اسمك واسم عيلتك، افتح مكتبك ليهم، شباب الاخوان فيهم معتقلين كتير على ذمة قضايا سياسية، وعاجلا او اجلا الحكومة هتتصالح معاهم وهيخرجوا، قدم انت السبت علشان تلاقي الحد..

– انتي كمان بقيتي بتفهمي في السياسة كويس اوي، بس فيه حاجة انتي ناسياها، منتصر مش معتمد على الناس، مش متغطي بالناخبين، معتصم بيدخل المجلس بمباركة ابوكي، عبد اللطيف البنداري، لازم الغطا دا يتكشف قبل اي حاجة..

= اللي انا طلبته منك يا عاصم الجزء اللي يخصك بس، اما حكاية اننا نطرد منتصر من جنة ابوك فدي لعبتي انا، وانا عارفة هلعبها ازاي، بس الاول محتاجين نتكلم في الأتعاب..

– طب ما انتي خدتي عزبة الفيوم

= عزبة ايه يا راجل، دا انا هجيبلك كرسي البرلمان، يعني هجيبلك الحصانة، والحصانة دي هترفع عمولتك في صفقات الأثار اللي بتشتغل فيها لل 3 اضعاف، بدل ما انت مجرد وسيط بتوصل البايع بالمشتري وتاخد عمولة، هتنقل قطع اثرية برا مصر وهتاخد نسبة، انت هتبقى vip يا عاصم، وانت عارف اكتر مني هتقدر تستفيد ازاي من عضوية المجلس، وللا تكونش عايز تقنعني انك داخل المجلس عشان تخدم اهل الدايرة

– انا مبقتش استغرب، انتي بقيتي شيطانة

= ما قولتلك يا عاصم مفيناش شياطين وملايكة، اعمل اللي قولتلك عليه وسيبني اتصرف مع منتصر

– طب ومنال

= سيب منال دلوقتي، كفاية اللي خدناه منها، منال دلوقتي اتضغطت وكتر الضغط يولد الانفجار، لو لعبنا معاها نفس لعبة الابتزاز هتهد المعبد فوق دماغ الكل، سيبها تخرج من السجن وتنسى التجربة دي خالص وتقدر تبدأ من الصفر وساعتها انا هعرف ازاي ارجعلك الشركة اللي مصطفى ضحك على بابا في هوجة التأميم اللي عملها عبد الناصر وخدها منه، بس ساعتها انا شريكتك بالنص..

– اتفقنا يا نهلة، انا لازم امشي دلوقتي، عندي شغل كتير في المكتب

= اوكيه يا متر، مع السلامة.. عاصم

– نعم

= تعمل ايه لو عرفت ان كل الحوار اللي دار بيني وبينك دلوقتي متسجل وهيوصل لبابا ولمنتصر؟؟؟

الحلقة التاسعه من هنا

الخطيئه

التاسعه