الخطيئة

– مديحة مراتي ازاي يعني ، انتي بدأتي تخرفي يا نهلة وللا بتقولي اي كلام تنقذي بيه رقبتك

= نهلة عمرها ما كانت بتقول أي كلام ، فوق لنفسك يا متر ، مراتك مرافقة أخوك وهي اللي كانت بتسجلك وهي اللي وقعتك ، الصور دي اتصورت في أوضة نوم منتصر ، شوف مين اللي قاعده على رجله دي يمكن تكون بتشبه عليها ولا حاجة ، مراتك رفعت عليك قضية حجر يا أستاذ هي وولادك وقالوا انك سفيه وبتبدد ثروتك في كلام فارغ وصفقات

مشبوهة واستعانوا بناس كتير من اللي انت وزعت عليهم فلوس في الانتخابات ، وانت محامي وفاهم كويس اوي القضايا اللي انت متهم فيها دي هتخلي موقفك عامل ازاي في قضية الحجر ، انت انتهيت يا أستاذ عاصم ، واللي خلصوا عليك هما أقرب ناس ليك ، ولادك وأخواتك ومراتك ، بس متخافش ، الحل عندي ، وعندي أنا بس

– ودي هتحليها ازاي يا نهلة ؟

= دا شغلي مش شغلك أنت ، وهتعرف كل حاجة في الزيارة الجاية ، سلام يا متر ..

« في شقة نهلة »

– أنا مش فاهم ايه الصور الغريبة اللي على الحيطان عندك دي ، ليه كلها سواد ودم

= أصلي غاوية فن تشكيلي

– وهو الفن التشكيلي مفيهوش غير المناظر الدموية دي

= وانت ليه محسسني انك كمنجاتي ، دا أنت سفاح يا مجدي ، انت كنت أشهر ظابط في الستينات مات على ايده مساجين من كتر التعذيب

– إشاعات والله يا نهلة ، انتي عارفة الصحافة في بلدنا بتحب التهويل

= إشاعات برضو ، طب واللي عملته في فؤاد الشيمي ، أظن دا بقى واقع أنا شخصيا شوفته واتعاملت معاه

– الله جرى ايه يا نهلة ، انتي قلبك هيحن وللا ايه ، مش انتي اللي كلمتيني يومها وقولتيلي فؤاد يطلعله أمر اعتقال ، وقعدنا في نفس الشقة دي اللي مغيرهاش الزمن وطلبتي مني ..

= أمرتك .. أمرتك يا مجدي ، أنا سيبتك تقولي يا نهلة بمزاجي بس انت دلوقتي في مملكتي وأنا مبطلبش من حد حاجة ، أنا بدي أوامر

– تمام يا افندم ، وساعتها أمرتيني اعرض فؤاد للتعـــــــ,,ذيب الممنهج بحيث انه يخرج من السجن نفسيته بايظة تماما ومجهز لأي دور هيتحط فيه ، بالمناسبة يا ترى فؤاد قام بالدور اللي كنتي راسماه بعد كل دا ، وللا تعبنا معاه ضاع هدر ؟

= أنا تعبي مبيروحش هدر ابدا ، ودا لأني عارفة كويس أنا بعمل ايه ، كل خطوة محسوبة ومدروسة ، والنتيجة اللي بوصلها حتى لو بعد عشرين سنة بتكون هي بالظبط اللي قصدت اوصلها ، مصطلح الصدفة مش موجود في قاموسي ، الحظ حصان عمري ما راهنت عليه ، أنا بعتمد على ذكائي وبس ، لا بخونه ولا بيخوني

– طالما طلبتيني تبقى عايزة مني حاجة ، اؤمريني يا ستي

= ستك وهأمرك ، بس مش عايزة منك حاجة ، انت اللي عايز مني

– عايز منك ايه

= برافو يا مجدي ، دايما بحب الناس اللي مؤمنة بيا ومتأكدة ان محدش غيري يعرف هما عايزين ايه ، حتى هما نفسهم ميعرفوش .. انت عايز ترجع الخدمة تاني يا مجدي بعد ما السادات فصلك

– وانتي هتعرفي تعملي دا ؟؟

= هاهاهاهاها ، الألم دا يا مجدي عشان متسألش السؤال دا تاني ، أظن دي أول مرة تتضــــــ,,رب فيها بالألم على وشك

– أنا خدامك ، وأسف على السؤال اللي سألته

= أنا هرجعك الخدمة تاني ، وهرجعك في نفس الجهاز اللي بتحب تشتغل فيه ، مصلحة السجـــ,,ون ، أنا عارفة ان دا مكان بتلاقي نفسك فيه وبتقدر تخرج كبتك وساديتك ، اول ما تقعد على مكتبك الجديد استنى مني تليفون عشان اديك أوردر مهم .. يالا ، انصراف دلوقتي ..

« في السجن »

– أخبارك ايه يا صبحي

= بخير يا ست نهلة

– مبروك البدلة الحمرا

= أنا رهن اشارتك يا ست نهلة ، نفذت كل اوامرك ، روحت سلمت نفسي واعترفت باللي عملته في سواق التاكسي اللي اسمه فؤاد دا وفديت أختك ، واديني اهو هموت بعد أيام

– محدش بيموت معايه يا صبحي ، انت هتعيش ، هتعيش على طول ، ومكافأة الطاعة عندي كبيرة اوي ، دا برغم ان الطاعة عندي مش عمياء ، أنا بشرحلك المهمة كاملة من الاول وبسمحلك بكل الأسئلة اللي ممكن تدور في خيالك وبديك الحرية تختار تكمل وللا لا ، أنا مش زي غيري

= انتي ست الكل ، وانا عمري ما هخالف العهد اللي خدته قدامك

– وانا مبخلفش وعودي ، سلام يا صبحي والى اللقاء في الجنة ..

« في سجن أبي زعبل »

– انت ايه اللي جابك هنا يا واطي

= الحق عليا جايبلك معايه عيش وحلاوة وجاي اطمن عليك ، قولي يا عاصم لو مش مرتاح في السجــــ,,ن دا أنا ممكن اكلملك حد ينقلك المزرعة وللا القلعة ، انت عارف أخوك عضو مجلس شعب وايده طايلة

– انت جاي تتشفى ، بس أنا بقى هحرق قلبك ، يا سيادة النائب ، لما تروح ابقى سلملي على ثريا وبوسهالي عشان وحشتني أوي

= قول اي كلام عايز تقوله ، انت دلوقتي زي التور المد,,بوح عمال تفرفر وتخبط يمين وشمال ، حلاوة روح يا عاصم ، ليه بتلاعبني وانت عارف انك مش قدي ، أنا لحمي مــــ..ســــــ,,موم

– بس لحم ثريا طري ، بقولك ايه ، مش انت عارف برضو ان مراتك عندها وحمة شبه الفراولاية كدا في لا مؤخذة اااااا ، اوعى تكون متجوزها بقالك كل السنين دي ومشوفتش الوحمة دي ، وللا انت هتشوفها ازاي صحيح ما أنت مشغول في قضايا الوطن ، اصل انا عارف ان الناس اللي بتنجح في السياسة دايما بيفشلوا في حياتهم الخاصة ، وبعدين هو انت لو كنت شوفت الوحمة كانت ثريا احتاجتني في حاجة ؟

= انت بتقول ايه يا كلب

– متاخدش الأمور بحساسية يا مونتي ، احنا اخوات يا جدع هو انا غريب ، وبعدين المليان يصب عالفاضي ، عارف ايه اللي يزعل فعلا ، ان الهانم كانت مرافقة ابن خالتها ، الواد الهيبز دا اللي كانت بتحبه قبل ما تتجوزك ، هي حتى مرة في ساعة صفا كدا وهي بتقشرلي الموز قالتلي ان الواد دا غلط معاها قبل الجواز وانت الشهادة لله طلعت شهم وسترتها وبدأت معاها صفحة جديدة خالص ، بس هي بقى الوطيان في دمها ، قرطستك وكانت بتقابله أثناء ما كنت حضرتك مشغول بهموم الناخبين ، اتقبض عليها وهي معاه في شقة في الجيزة ، وكانت هتلبس قضية آداب ، كلمتني على تليفون المكتب وقالتلي الحقني من الفضيحة ، وقدرت اخرجها من غير حتى ما يتعملها محضر ، وخدت اتعابي في القضية دي مشاعر إنسانية ، بس يا حرام تلاقيها دلوقتي حست بالفراغ تاني ..

 » بعد الزيارة دي منتصر خرج من عند عاصم دمه فاير ، قتل مراته ودخل السجن الكلام اللي سمعه من عاصم مع تأثير المخدرات اللي كان بيتعاطاها خلوه فقد صوابه ، وعاصم هرب من السجن ، نهلة هي اللي سهلتله عملية الخروج ، عاصم هو كمان قتل مراته ، وجالي البيت وفضحني بالصور اللي كان ماسكها عليا قدام مصطفى جوزي ، صوري أنا وفؤاد ، مصطفى ساعتها طلقني بالتلاتة ..

عاصم كان عامل زي التور الهايج بيضرب في الكل ، مكانش واعي للي بيعمله ، لدرجة أنه حاول يقتل نهلة بس المحاولة فشلت ..

لما مصطفى طلقني كنت ساعتها خلفت شادي ، ابني ، بس مصطفى خده مني وطردني ، حتى بيت بابا اتقفل في وشي ، ملقيتش اي مكان اروحه غير بيت نهلة ..

نهلة فهمتني اني عمري ما هشوف ابني تاني ، لأن مصطفى يقدر يرفع قضية ضم ويكسبها بالصور اللي معاه لأني في نظر القضاء ست ساقطة ومش أهل لحضانة طفل ..

أنا خسرت كل حاجة ، قلبي كان بيتقطع من الحسرة ، بس نهلة قالتلي اطمني ، اللي يشرب من الواين بتاعي عمره ما يخسر ابدا ..

الحل الوحيد ان مصطفى السباعي يموت ، وساعتها تبقي كسبتي ابنك وكسبتي كل ثروة مصطفى بصفتك الوصي على ابنك ..

كنت وصلت لمرحلة بقيت فيها مسلوبة الإرادة قدام نهلة ، وافقت على اللي قالته كله ونفذته ، واتخلصت من مصطفى واستوليت على عرش امبراطوريته ، بس من الساعة دي اتحولت لوحش مستعد يفترس اي حد هيفكر يقرب من ثروتي أو ابني ..

شادي كبر ، ودخل الجامعة ، ومشاكله كبرت ..

كان عنيد ومبيسمعش كلام حد ، مكانش حد يقدر يفرض عليه شيء هو مش حابه ..

وكل دا كان يهون لو وقفت الحكاية عند اختياراته في الدراسة أو في الناس اللي بيصاحبهم ..

لكن لما يروح يحب بنت شحاتة زميلته في الجامعة يبقى دا اللي ميتسكتش عليه ابدا ..

كان لازم أتدخل واعرف كل حاجة عن البنت دي ..

يتيمة ..

ساكنة في المقطم ..

امها خياطة ومعندهاش ولاد غيرها ..

أخواتها كلهم وابوها ماتوا في حريقة قامت في شقتهم من 20 سنة ، كانت امها في الوقت دا حامل فيها وكانت بايته عند أهلها يوم الحادثة ودا اللي نجاها من الموت هي واللي في بطنها ..

اسمها دينا فؤاد الشيمي …

الحلقة الثانية عشر والاخيره من هنا

الخطيئه

الاخيره

– كل حاجة بتتهد فوق دماغي يا نهلة ، أنا كنت فاهمة ان الماضي بيموت ، الماضي كله بيطاردني دلوقتي زي الأشباح ، كل اللي انا عملته زمان راجعلي دلوقتي

= ايه اللي حصل يا منال ؟

– شادي ، ابني اللي طلعت بيه من الدنيا ، بيضيع مني ، ساب بنات مصر كلهم وراح يحب بنت فؤاد الشيمي ، أخته

= ايه ، انتي اتجننتي يا منال وللا بتخرفي ، فؤاد مات هو وكل ولاده على يدك

– مش كلهم ، فؤاد كان قايلي قبل ما يموت يوم ما اديته الشيك ان مراته حامل ، كانت حامل في بنت ، من حسن حظها أنها ماكانتش بايتة في الشقة يوم ما حرقناها ، البنت دي كبرت وحبت شادي ، أنا كنت فاكرة ان المصيبة في انه بيحب واحدة مش من مستواه ، اتاري المصيبة اكبر من كدا بكتير ، خلصيني من الكا..رثة دي يا نهلة

= وابنك عرف بنت فؤاد منين ؟

– زميلته في الجامعة

= وهي سابت ولاد الجامعة كلهم وراحت حبت شادي بالذات

– النصيب

= مفيش حاجة اسمها النصيب والقدر والكلام الفارغ دا ، كلها اختياراتنا احنا ، البنت دي مزقوقة على ابنك

– عشان فلوسه ؟

= مش بس ، البنت دي عارفة ان شادي ابنك ، وقاصداكي انتي بالتحديد ، عايزة تضربك في مقتل ، متنسيش انك كنتي متهمة في قتل ابوها زمان ، اكيد امها رضعتها كرهك لحد ما جه اليوم اللي عرفت تحرق قلبك فيه على ابنك زي ما يتمتيها قبل ما تتولد

– يبقى تختفي

= مش بالسهولة دي ، زمان انتي خرجتي من قضية قتل ابوها عشان قدرت اخلي صبحي يشيلها عنك ، دلوقتي لو الموضوع حصل فيه اي غلطة والنيابة اتهمتك بقتل البنت مش هتخرجي منها ، وحتى لو العملية تمت بنضافة ، هتحرقي قلب ابنك وهتخسريه للابد

– طب والعمل ؟ هسيب الواد يتجوز أخته

= وليه لا

– انتي بتقولي ايه ، انتي اتجننتي

= مفيش حل غير دا

– اسيب الأخ يعاشر أخته

= يتجوزها .. قلت يتجوزها مش يعاشرها

– ودي همنعها ازاي دي

= قبل الفرح يتصدم فيها ، يعرف أنها بتخونه ، يزعل كام شهر بس في الآخر محدش بيموت من وجع القلب ، ساعتها تبقى بتاعتنا ، نعمل فيها اللي احنا عايزينه

– وهيتصدم فيها ازاي ؟

= دي سيبيها عليا ، وخليني احاول مع شادي محاولة أخيرة يمكن يقتنع بكلامي ..

« في الكافيتيريا »

– اسمعوا يا ولاد ، أنا عارفة أنكو بتحبوا بعض وأنا اكتر واحدة ممكن تحس بيكو وتقدر نبل مشاعركم ، بس منال مش هتسيبكم في حالكم ، منال مش ناويالك على خير خالص يا دينا

= هتعملي ايه يعني

– تقدر تعمل كتير ، تقدر تمحي وجودك اصلا

# بقولك ايه يا نهلة

– نهلة ؟ ايه يا شادي ، انت كبرت للدرجادي وأنا مش واخدة بالي ، مفيش حتى خالتو نهلة

# لا مفيش ، واسمعي اللي هقولك عليه ، أنا طول عمري بكرهك ، عارفة بكرهك ليه ، لأني فاهمك كويس اوي ، مش هتعرفي تضحكي عليا زي ما ضحكتي على غيري ، أنا عارف ان انتي السبب في كل الخراب اللي حل على عيلة البنداري من سنين ، ولو فاهمة انك هتقدري تعيدي المأساة دي في جيلنا تبقي غلطانة

= عيب كدا يا شادي ميصحش تتكلم مع خالتك كدا ، أنا آسفة جدا يا تانت

# اسكتي انتي يا دينا انتي مش فاهمة حاجة ، نهلة دي مش انسانة ، نهلة دي شيطانة

– شكرا يا ابن اختي ، على العموم أنا كنت جاية احذركم ، جرب تاخد كلامي دا جد ، كل ثانية بتفوت عليكم وانتو قدام عيون منال فيها خطر على حياة الغلبانة دي ، انت في الأول أو في الآخر ابنها ، عمرها ما تئذيك ، اهربوا يا شادي ، اهربوا واتجوزوا ..

« في بيت منتصر »

– رؤوف ، يمكن تكون العلاقة بيني وبينك أنت وانچي مش في احسن حالاتها بسبب الخلافات القديمة ، بس أنا عارف انكم نضاف ، عشان كدا انا جيت هنا دلوقتي أنا ودينا نلجألكم

= واحنا اخواتكم يا شادي ، وعمري ما دخلت نفسي ولا دخلتك في الخلافات اللي بين أهالينا ، حتى ولاد خالك عاصم ، أنا علاقتي بيهم كويسة جدا ..

– حيث كدا أنا هحكيلك كل حاجة ..

 » شادي حكى كل حاجة لرؤوف ابن خاله ، لما رؤوف عرف ان شادي بيحب دينا وعرف دينا دي تبقى مين كشف السر اللي عيشت طول عمري اخبيه ، رؤوف كان عارف حكايتي مع فؤاد الشيمي من ولاد عاصم وولاد عاصم عرفوا الحكاية من ابوهم قبل ما يتسجن ، وشادي عرف ان دينا تبقى أخته وان أنا اللي قتلت ابوهم واخواتهم ومن لحظتها شادي ابني أتحول لأكبر عدو ليا ، راح النيابة وقدم كل المستندات اللي خدها من ولاد عاصم والنيابة أمرت بفتح التحقيق في قضية فؤاد الشيمي تاني بعد 20 سنة ، وهربت عند نهلة ، في الوقت نفسه عاصم ومنتصر هربوا من السجن بعد ما كان محكوم على كل واحد فيهم في قضايا تخليه يكمل بقية حياته في السجن ، ونهلة جمعتنا كلنا عندها في شقتها ..

****************

رؤوف كان شايف اننا بعد اللي عملناه في ماما دا حياتنا كلنا مبقتش في أمان ، أنا ودينا وولاد خالي عاصم ، كلنا في خطر ، أنا مكنتش مصدق الكلام دا وكنت شايفه بيبالغ

– انت بتقول ايه يا رؤوف ، يعني أمي ممكن تقتلني زي ما قتلت ابويا زمان

= ليه لأ ، أمك زيها زي أهلي وزي خالك عاصم ومراته واقعين تحت السيطرة الكاملة لنهلة ، ممكن يعملوا اي حاجة في الدنيا ونهلة دي هي أس الخراب ، أنا شايف ان الحل الوحيد اننا نروح لجدك ، نتحامى فيه ، هو الوحيد اللي يقدر يخلصنا من كل دا

– جدي ، أنا طول عمري بسمع عنه بس عمري ما قابلته

= أنا وولاد خالك عاصم على اتصال دايما بيه وهو بيحبنا جدا ، جدك عظيم اوي يا شادي وطيب ، كل الكلام اللي اهالينا كانوا بيحكوهلنا عنه كدب عشان يبعدونا عن طريقه ..

 » ودخلت قصر البنداري لأول مرة في حياتي ، قصر كبير جدا زي اللي بنسمع عنه في حواديت ألف ليلة وليلة مليان خدم وحراس ، كنت متخيل جدي دا راجل عجوز ومكحكح ، لكن لما شوفته لقيته حاجة تانية خالص ، له هيبة كإن الزمن مأثرش فيه أو كإنه هو الزمن ذاته ، لابس بدلة شيك جدا وفي ايده عصاية عاج وعلى رأسه طربوش ، شبه الباشاوات بتوع زمان أو هو واحد منهم بالفعل ، في كامل صحته وتركيزه ، رحب بينا أول ما شافنا ..

– يا اهلا بالطيبين ، اهلا بالزرعة النضيفة اللي خرجت من أرض مش نضيفة ، دا دليل في حد ذاته على ان كل انسان بيختار مصيره بحرية كاملة ، أنا عارف ان الرحلة كانت متعبة ، اطلعوا فوق دلوقتي ارتاحوا وبعدين هبعتلكم ..

**********************

– اهلا بيكم في مملكتي ، لازم تعرفوا ان دا المكان الوحيد الآمن ليكم في العالم كله ، وانا بس اللي هقدر احميكم واحافظ على حياتكم ، لازم تنسوا كل اللي حصل بينكم زمان وتتوحدوا تحت ملكي ..

كلكم شربتم من الكاس ، كاس الخطيئة الأولى ، وكلكم دلوقتي تحت سيطرتي الكاملة ، بس عشان دا يتحقق فيه طقوس لازم تعملوها ، طقوس إعلان الولاء ليا ، لنهلة وبس ..

كلكم دلوقتي بالأمر هتسجدوا قدامي ، وبعدها ارواحكم هتكون ملكي ..

 » وسجدنا بالفعل قدام نهلة ، محدش فينا كان عنده اختيار ، بس فجأة حصلت حاجة غريبة ، حسينا المكان كله بيترج كإنها لعنة ربنا صبها علينا من السما ، الخوف ملا قلوبنا ، وفي لمح البصر المكان اتملا حراس ، كتفونا وغموا عيوننا وخدونا على مكان مجهول ..

**********************

– الرحلة انتهت ، وكلكم رجعتوا هنا تاني ، لنفس المكان اللي كل شيء بدأ فيه ، عاجبكم اللي وصلتوا نفسكم ليه ، فاكرين الصوت دا وللا خلاص نسيتوه

= بابا ؟؟

– أنا مش ابو حد يا منال ، ودا السر اللي خبيته عنكم طول العمر لحكمة كنت عارفها وقاصدها ، كنت عايزكم تعرفوني بقلوبكم من غير طمع ولا خوف ، أنا مخلفتش ومبخلفش ، وجيبت كل واحد وواحدة فيكم من مكان شكل ، عاصم مثلا أنا جيبته من قدام باب جامع في الشرقية ، وبعدها بسنين جبت نهلة من ملجأ كان عمرها ايام ، وبعدها جبت منال من كوم زبالة ، وبعدها جيبت منتصر من دار أيتام ..

كنت كل مرة بجيب فيها واحد منكم بفهم الباقيين ان أمهم بتولد مولود جديد ..

لما قسمت عليكم الفلوس مكانتش دي ثروتي ، كانت فتافيت متجيش اي حاجة في اللي أملكه ، وكنت عارف ان كل حاجة هترجعلي في النهاية زي ما انا كنت عارف انكم هتقطعوا بعض على الفتافيت دي ، أنا كنت هنا في قصري وعارف كل اللي بيحصل برا ، كنت شايفكم ثانية بثانية

# ولما انت شايفنا وعارف ان كل دا هيحصل ممنعتناش ليه

– مكانش ينفع لانكم من البداية مخيرين وكل واحد فيكم هيتحاسب على اختياره ، ياما حذرتكم من نهلة ما سمعتوش كلامي ، من يوم ما خالفت اوامري هنا قدامكم واعلنت

انضمامها لجمعية سرية لعبادة الشيطان ، يومها أنا طردتها من البيت وحذرتكم منها محدش سمع كلامي ، مشيتوا وراها لحد ما وصلتكم انكم تسجدولها ، كنت كل يوم بستنى اي حد فيكم ييجي يخبط على بابي ويقولي انه ندمان وعايز ينضف ، لكن انتو اخترتوا تمشوا في طريق الشيطان للاخر

* مش ذنبنا اننا اتخدعنا في أختنا ..

– دي مش أختكم ، افهموا بقى ، اختكم ماتت من يوم ما خرجت من القصر ، انتحرت وانتو كلكم مشيتوا في جنازتها ..

ودا اعتراف نصي مكتوب بخط ايديها بتقول فيه أنها باعت روحها للشيطان

 » وفجأة المكان كله اتملا شاشات عرض ضخمة جدا كانت بتعرض كل لحظة في حياتنا ، كل جرايمنا وكل اخطاءنا كل حاجة ، شوفنا نفسنا في جنازة نهلة واحنا شايلين النعش وبنعيط ، الغريبة اننا دلوقتي فاكرين كل حاجة لكن قبل كدا كنا ناسيين ، ازاي ضحكت علينا ..

# صح ، نهلة ماتت ، أنا فاكر دا كويس ، بس امال دي تبقى مين

– بصولها وانتو تعرفوا

 » بصينا على نهلة لقينا شكلها اتغير تماما ، بقت مسخ قبيح جدا عمرنا ما شوفنا زيه قبل كدا ..

* نهلة ضحكت علينا

– مفيش نهلة ، نهلة باعت نفسها للشيطان ، اللي ضحك عليكم هو الشيطان نفسه ، كل واحد فيكم كان جواه الخير والشر بس اختار الشر ودلوقتي جه الوقت اللي لازم تدفعوا فيه تمن اختياركم ..

# طب سامحنا واحنا مش هنعمل كدا تاني ، ادينا فرصة تانية ..

– للأسف فات الوقت ، انتو دلوقتي في مرحلة تنفيذ المصير اللي اخترتوه بنفسكم ، أولادكم هيفضلوا هنا في الأمان والسلام والراحة لأنهم طيبين اختاروا الخير وهربوا من الشر ، أما انتو هتواجهوا مصيركم المظلم لوحدكم لأن دا كان اختياركم من الأول ومحدش اجبركم على حاجة ..

تمت ،،،